ليه الذكاء الاصطناعي بكتب كود كويس لكن ما ببني منتج كويس ؟!!

الناس بقوا يقولوا إنو برامج زي Trello وNotion خلاص انتهى زمنها، لأن الذكاء الاصطناعي هسي بقدر يعمل ليك برنامج كامل في دقائق. لكن أنا ما مقتنع بالكلام دا.

صحيح الذكاء الاصطناعي بكتب كود سريع ، لكن كتابة الكود براها ما كفاية. الحاجة الصعبة فعلاً هي إنك تعمل برنامج الناس ترتاح ليهو وتحب تستخدمو.

مثلاً، لو طلبت من Claude يعمل ليك برنامج إدارة مهام، غالباً حيعمل ليك حاجة شغالة. لكن هل شكلها مرتب؟ هل الاستخدام ساهل؟ هل خطوات العمل منطقية؟ هل المستخدم حيستمتع بيها؟ هنا المشكلة.

أنا لمن أطور برامج، أغلب وقتي ما كان في كتابة الكود. كان في التفكير: المستخدم حيعمل شنو؟ كيف نرتب الصفحات؟ كيف نخلي التواصل بين الفريق ساهل؟ كيف نخلي كل حاجة واضحة؟ الحاجات دي الذكاء الاصطناعي لسه ما شاطر فيها زي البشر.

وفوق دا كلو، مرات الذكاء الاصطناعي بغلط في security. مرة تقريباً خلّى بيانات حساسة متاحة لكل الناس بسبب تعديل غلط في الإعدادات.

عشان كدا أنا شايف إنو الذكاء الاصطناعي حالياً مساعد ممتاز، لكن ما بديل كامل لمصمم أو المبرمج أو صاحب منتج فاهم المستخدمين.

وبرضو عندي سؤال: لو كل الناس بقوا يبنوا برامج بالذكاء الاصطناعي بنفس الطريقة، هل حنشوف ابتكار جديد؟ ولا كل البرامج حتبقى شبه بعض؟